922 naserbisyuhan sa Aksyon Agad

CEBU, Philippines — Niabot sa 922 ka residente sa Barangay Lawaan 3, Dakbayan sa Talisay ang naserbisyuhan sa kagamhanan niadtong Enero 31 ubos sa Aksyon Agad sa Barangay nga programa.

Kini human si Mayor Gerald Anthony “Samsam” Gullas Jr. nihimo sa maong programa sa pagdala sa serbisyo sa City Hall ngadto sa kabarangayan.

Gullas uban sa iyang konseho niabi-abi sa mga residente inubanan sa paghatag og serbisyo sama sa libreng pagkonsulta sa panglawas, mata, binuhing mga iro ug iring, libreng tambal alang sa mga kumon nga sakit ingon man bitamina.  Aduna sab ang licensing personnel nga niatiman sa mga pag-renew sa permit sa ilang mga negosyo, transaksyon sa engineering office ug uban pa.  Gawas niana, ang kapolisan sa siyudad nga pinangulohan ni Police Major Gerard Ace Pelare nidala sa ilang nagkadaiyang programa sama sa Police and Partners Act of Kindness for the Children in Talisay.

Niabot sa 260 ka kabataan ang ilang gipakaon ug gihatagan og mga regalo.  Mao sab kini ang higayon nga ilang gilusad ang Oplan Kalinaw Talisay.

Samtang gihimo sab nila ang Oplan Sidlak o gitawag nga Studyanteng Isog Batok Druga Lamdag ang Kaugmaon.

Ang program ni-target sa mga tinun-an sa high school aron motabang sa ilang kampanya batok sa ginadiling drugas. Ang Aksyon Agad sa Barangay molungtad pa sa Lawaan 3 hangtud karong Pebrero 7 kay daghan pa man ang nihangyo aron makapahimulos sa serbisyo.

Si Gullas nagkanayon nga magdepende ang ilang serbisyo sa gidaghanon sa mga molupyo sa usa ka barangay.

Sa mosunod nga Aksyon Agad sa Barangay hiouon sa tibuok 22 ka barangay sa dakbayan. /GMR (BANATNEWS)