Resolusyon batok nCov giduso

CEBU, Philippines — Tungod sa hulga sa novel Coronavirus (2019-nCoV) si Cebu City Councilor Alvin Dizon niduso og resolusyon nga kusganong nagawhag sa mga tagdumala sa mga hotels, restaurants, malls, terminals nga siguraduhong limpyo kaniya ang ilang mga pansayan ug hugasanan sa mga kamot sa tanang oras.

Ang resolusyon nag-ingon nga kinahanglang adunay agas sa gripo, dunay anti-bacterial soap, 70 percent alcohol-based hand sanitizer, hand dryer o clean wipes o tissue para sa ilang mga kustomers.

Giawhag sab sila pagbutang og signages, posters o decals, diha sa ilang mga pansahan o hugasan nga magpakita sa hustong pamaagi sa paghugas sa mga kamot ug sa kamahinungdanon     niini.

Sa pikas bahin, si City Legal Officer Rey Gealon miingon nga karong gipaubos na sa state of preparedness ang siyudad, ipatuman pagbalik ang joint memorandum circular 2013-1 nga gipagawas niadtong Marso 25, 2013 subay sa Republic Act 10121 o ang National Disaster Risk Reduction and Management Act of 2010.

Matud sa abogado, ang maong balaod nagmando sa tanan kinahanglang maghimo og mga lakang sa pagpangandam ug dili lang pagtubag sa katalagman.

Sa pikas bahin, si Lapu-Lapu City Mayor Junard “Ahong” Chan miklaro nga wala sila mosupak sa sugyot sa gobernador nga i-quarantine ang mga biyahidor gikan sa China.

Matud niya, bisan kaduhaduhaan kun duna bay kabutangan kanila apan mosuporta gihapon sila sa tanang mga pamaagi aron mapugngan ang pagkatap sa maong sakit.

Sumala pa niya nga anaa na sa presidente sa nasud ang gahum sa pagsuspenso sa mga biyahe base sa rekomendasyon sa mga hingtungdang ahensya. Mao nga atol sa press conference iyang gisugyot ngadto sa DOH nga irekomendar ngadto sa presidente nga palapdan pa ang travel ban.

“I maintain that protecting my constituents is primordial over economic enterprise,” matud pa sa pamahayag sa mayor. /IBM (BANATNEWS)