Oratio imperata

CEBU, Philippines — Diyos, among Amahan, misangpit kami kanimo niining panahon sa among panginahanglan nga unta mapanalipdan mo kami batok niining hulga sa 2019 N-Corona Virus nga mikalas na sa pipila ka mga kinabuhi sa among kaigsuonan ug naghiagom sa kadaghanan.

Nangaliyupo kami sa imong grasya alang sa mga tawo nga gitahasan sa pagtu-on sa hinungdan niining maong virus nga nagdala sa makalilisang nga sakit. Giyahi ang mga kamot ug lamdagi ang mga hunahuna sa mga doktor nga nag-alima sa mga masakiton subay sa ilang katakus og dinuyogan sa gugma ug kaluoy. Kanila usab nga mga kawani sa lokal ug nasudnong pangagamhanan ug kanilang mga pribado nga mga ahensya nga nangita ug kasulbaran sa maong epidemya, mahatagan unta sila sa imong Diyosnong lamdag.

Nangaliyupo usab kami kanila nga nahiagom sa maong epidemya, mahatag unta pagbalik ang kapiskay sa ilang panglawas.

Itanyag kanamo ang grasya nga magkahiusa kami sa pagbuhat alang sa kaayohan sa tanan ug pagtabang sa mga nagkinahanglan.

Kini among gipangayo pinaagi sa among Ginoong, Jesu Kristo, imong Anak, nga nagapuyo ug nagahari uban kanimo diha sa kahiusa sa Espiritu Santo, Diyos, hangtud sa kahangturan. Amen.

Maria, Panabang sa mga Kristiyanos, I-ampo mo kami.

San Rafael Arkanghel, I-ampo mo kami.

San Roque, I-ampo mo kami.

San Lorenzo Ruiz, I-ampo mo kami.

San Pedro Calungsod, I-ampo kami.