Dugang karsada ugmaron paingon sa bukid

CEBU, Philippines – Nagplano ang kagamhanan sa Siyudad sa Sugbo nga mag-ugmad og dugang alternatibong mga agianan nga magkonektar sa mga bukirang barangay.

Kini sumala pa ni Konsehal Jerry Guardo subay usab sa direktiba ni Mayor Edgardo Labella.

Ang giplanohan mao ang gikan sa Barangay Pardo paingon sa Barangay Toong nga moabot sa unom ka kilometros ug ang Barangay Pamutan paingon sa Campo Cuatro sa utlanan sa Dakbayan sa Talisay.

Pinaagi sa Pardo-Toong ug Pamutan-Campo Cuatro nga mga dalan, mosumpay kini sa Sapangdaku diin ang siyudad nagplano sa pag-abli og karsada lapos sa Barangay Babag.

“In other words if you are from the south and then gusto ka moadto sa central highway, dili naka moagi sa Lahug JY sa city, in order to decongest the traffic sa uptown particularly Lahug,” matud ni ni Guardo.

Aduna nay dalan sa Pamutan apan wala kini nagkonektar sa Campo Cuatro diin dili mominus tulo hangtud upat ka kilometros nga karsada ang gikinahanglan.

Reklamo sa mga residente sa Pamutan mao nga kinahanglan sila moliko sa lugar kung moadto sa merkado. Matud ni Guardo nga ang siyudad karon aduna nay negosasyon sa mga tag-iya sa yuta ug nangonsulta na sa mga barangay ug sa mga residente.

“Mao atong directions, we’re looking at opening alternative roads to decongest the traffic in the low land barangays,” matud ni Guardo.

Tinguha sa siyudad nga sa 2021 magsugod na ang pag-ugmad sa mga agianan. /GMR (BANAT NEWS)