Lalaki gidunggab patay sa silingan

CEBU, Philippines – Patay ang usa ka 32-anyos nga lalaki human kini dunggaba sa ilang silingan kagahapon sa buntag diha sa Barangay Tinago, Dakbayan sa Sugbo.

Giila sa kapolisan ang biktima nga si Dennis Escarilla, nagpuyo sa maong lugar ug ang suspek mao si Rolly Alfonso, 40-anyos silingan sa biktima.

Matud ni Police Major Jomar Pomarejos hepe sa Waterfront Police Station nga sa wala pa mahitabo ang insidente naglakaw si Escarilla diha sa dalan ug kalit lang kining gikomprontase ni Alfonso.

Giingong dugay na nga adunay personal nga gibangian ang duha ug taliwala sa ilang panaglalis kalit lang nga gidunggab sa suspetsado ang biktima. Ang suspetsado giingong nisuway kini sa pag-ikyas human sa maong hitabo apan naabtan kini sa mga polis ug nasikop.

Ang suspetsado natanggong karon sa Waterfront Police Station ug gikatakda kining pasakaan og tukmang kaso. /BDB (BANAT NEWS)