Labing daku nga butane refilling gironda

CEBU, Philippines – Dul-an sa P7 milyones nga balor sa butane ang nasakmit atol sa pagronda sa ilegal nga backyard refilling plant sa Sitio Dapdap, Kalunasan, Dakbayan sa Sugbo niadtong Martes sa hapon.

Ang mga tinugyanan sa Department of Energy ug Criminal Investigation Detection Group 7 ang nihimo sa pagpangronda.

Matud ni Major Ronald Allan Tolosa, assistant regional chief sa CIDG-7, nga 10 ka tawo ang ilang nasikop nga naglakip sa giingong operator nga sila si Slyves Janelle Justice Monares ug Jamaica Fe Carbo.

Lakip sa nadakpan ang driver, pahinante ug tig-refill sa mga butane nga anaa na karon sa buhatan sa CIDG-7.

Ang CIDG-7 nakadawat og suwat gikan sa buhatan sa DOE pinaagi sa taho sa concern citizens may kalabutan sa illegal refilling sa butane sa maong lugar hinungdan sa pagpaniid dayon sa paghimo sa operasyon.

Matud ni Tolosa nga ang mga dinakpan walay gipakita nga mga dokumento gikan sa buhatan sa DOE ug kini kalapasan sa Presidential Decree No. 1865.

Nasakmit ang 11 ka refilling machines diin dili mominus sa 5,000 ka butane ang mahimo niini matag adlaw.

Mapasalamaton ang legal officer sa DOE Visayas Field Office, Atty. Rusmark Gamallo, sa CIDG-7 ug sa abag sa komunidad sa pagtaho sa labing daku nga planta sa tibuok Rehiyon 7 ug bisan gani sa tibuok nasud tungod sa kadaghan nga refilling machines ang nakuha.

Kasong kriminal ug administratiba ang atubangon nga kaso sa mga dinakpan nga adunay silot nga pagkapriso ug multa.

Awhag ni Gamallo sa katawhan nga dili mopalit sa mga ilegal nga butane canisters kay maghatag usab kini ug risgo.

Sunog

Sa laing bahin niabot sa 13 ka panimaye ang naugdaw ug duha ang nakan-an human niulbo ang sunog sa Sitio Mahayahay, Poblacion, Dakbayan sa Talisay sa niadtong Martes sa hapon.

Usa ka Romy Patindol ang napaso atol sa among sunog apan first degree burn lang kini samtang nagbilin og P125 mil nga danyos.

Sa inisyal nga pakisusi nagsugod ang sunog sa panimaye ni Aniano Sabroso Jr. Usa sa gitan-aw nga hinungdan ang electrical ignition o spark sa koneksyon sa usa sa mga appliances sa panimay ni Sabroso. /GMR (BANAT NEWS)