Gwen niawhag pagminus sa gamit sa aircon

CEBU, Philippines – Giawhag ni Gobernador Gwendolyn Garcia ang mga pangulo sa ubang provincial-owned facilities sa Probinsiya nga magdaginot usab og kuryente pinaagi sa minus nga paggamit sa aircondition units.

Kini human gipatuman sa Kapitolyo ang pagminus sa airconditioning system isip usa sa preventive measure sa “mysterious respiratory virus” gikan sa China nga gikabalak-an nga moabot sa nasud.

Matud ni Garcia nga sa ubang pasilidad sa probinsiya sama sa 16 ka provincial ug district hospitals, magdepende kini sa mga chief of hospital sanglit aduna may mga lawak nga kinahanglan ang aircon sama sa operating room ug private rooms.

“It depends on the recommendation the chief of hospital kay depende sa environment,” matud ni Garcia. Si Garcia mopatuman sa pagminus og gamit sa aircon ug ilapos lang ang hangin sa Provincial Capitol sanglit iyang nasayran ang misteryuso nga sakit gikan sa China mapakatap pinaagi sa air-conditioning.

Gawas niini, makadaginot usab ang Kapitolyo sanglit sa pagkakaron sobra usa ka milyon ang mabayran sa kuryente sa Kapitolyo.

Dugang ni Garcia nga mananom usab sila og daghang tanom o kahoy sulod sa Capitol compound aron mas presko ang hangin. /GMR (BANAT NEWS)