Wala pay nagparehistro alang sa fluvial

CEBU, Philippines — Subling nanawagan ang Philippine Coast Guard sa mga gustong moapil sa umaabot nga fluvial procession nga magparehistro na sa ilahang buhatan.

Hangtud karon wala pay nagparehistro diin niadtong buwan sa Disyembre pa sila nagpahibawo nga nagsugod na og pagpanawat og registration sa mga banca ug motorbanca nga mosalmot sa fluvial procession.

Sigun ni Lieutenant Junior Grade Michael Encina nga ang inisyal nga nasabutan nga deadline sa pagpanawat og registration karong Enero 17. Kadtong mga magparehistro moadto lang sa buhatan sa PCG-7, mag-fill up sa form nga ihatag ngadto nila og dili kalimtan ang pagdala sa mga gikinahanglan nga rekisitos sama sa safety requirements sa Maritime Industry Authority ug wala’y bayad ang pagparehistro nila.

“Ganun pa rin naman po yung registration natin is wala po siyang bayad at the same time yung mga safety equipment we’ll also be check, yung mga safety certificates nila dapat po meron din before natin ipasama dun sa fluvial procession natin,” asoy ni Encina.

Mahitungod sa pagpangandam nga gihimo sa PCG-7, si Encina nibutyag nga duna sila’y implementation plan sa Sinulog Fluvial Procession, dunay mga barko nga detailed nga mo-participate sa procession ingon man mohatag og maritime safety and security.

Nakig-alayon sab sila sa ubang maritime law enforcement agencies sama sa PNP Maritime, Cebu Port Authority, Philippine Navy, ingon man reserved partners sa PCG nga mao ang PCG Auxiliary. /GMR (BANATNEWS)