Pagbayad sa buhis hangtud Enero 20

CEBU, Philippines — Nidagsa ang katawhan nga nilukat og permit sa Dakbayan sa Talisay sugod Enero 2 hangtud kagahapon.

Si City Treasurer Emma Macuto nibutyag nga daghan ang mga magbubuhis nga nipahimulos sa 20 porsyento nga diskwento alang sa real property tax.

“Wa ko maanad kay sa miagi gyud nga tuig anha lang modagsa ang mga tao panahon nga mag-deadline nata,” asoy pa ni Macuto.

Anaa sa 3,000 ka establisemento ang gipaabot nga mokuha og renewal sa ilang permit.

Matud ni Macuto nga adunay mga taxpayers nga badlungon apan motuman ra sab hinoon sa pagpadala nila og suwat.

Ang deadline sa pagbayad o pag-renew karong Enero 20 ning tuiga.

Sa Dakbayan sa Lapu-Lapu, gipahibawo ni City Treasurer Felecitas Baguio ang “one-stop-shop” sulod sa Hoops Dome alang sa paspas nga pag-proseso ug sayon nga pag-renew sa business permit sa tuig 2020.

Si Baguio niingon nga ilang gisugdan ang pagdawat og mga dokumento sugod niadtong Enero 2 ug gikatakda kining matapos sa Enero 20.

Human sa maong petsa, pahamtangan na og multa ang mga magbubuhis.

Mga gikinahanglan nga dokumento alang sa pag-proseso sa mga business permit mao ang barangay business clearance, annual income tax return, quarterly income tax return, monthly VAT return ug uban pa.

Gisugyot ni Mayor Junard “Ahong” Chan ang one stop shop sa processing sa business permit ug renewal alang sa dinalian ug paspas nga proseso gawas nga ang kagamhanan sa maong dakbayan ang nagtanyag usab og libreng kape.

Sa Siyudad sa Sugbo, ang one-stop-shop sa processing sa renewal sa business permits anaa sab sa Level 2 sa SM City Cebu.

Si Attorney Jerone Castillo, officer-in-charge sa City Treasurer’s Office, nagkanayon nga nagpaabot sila sa 40,000 ka establisemento nga mag-renew sa ilang permit. Gipasabot ni Castillo nga kutob ra unta sa Enero 20 ang deadline apan gihangyo nila ang Sangguniang Panlungsod lugwayan hangtud sa Enero 31 gikan sa alas 9 sa buntag hangtud sa alas 6 sa gabii.

Si Attorney Jared Limquiaco sa Business Permit and Licensing Office niingon nga adunay silot nga ipahamtang alang sa mga mapakyas sa pagbag-o sa ilang mga permiso sa gihatag nga gidugayon.

“Two years na ang validity sa business permits. Taxes same lang, mo due siya depende sa gi-choose sa business owners. Pwede man quarterly or annual, sa mga annual, annual ra gihapon mobayad, same sa quarterly. Doesn’t mean mo times two ang bayad. Actually the same for next year, dili na sila mo-renew sa amo, mobayad lang sila,” matud ni Limquiaco.

Ang one-stop-shop dili lang limitado sa mga permiso sa negosyo apan ang publiko mahimo usab makakuha sa delivery permits, mga special nga permiso, sanitary permit ug cedula.

Ang bayad alang sa Real Estate Taxes (RPT) anaa sa Level 3 sa SM City samtang ang one-stop-shop abli sab sa Sabado gawas sa Enero 18 nga mao ang adlaw sa dili pa ang Sinulog Festival. /GMR (BANATNEWS)