Krimen gibantayan sa kapolisan sa bag-ong tuig
CEBU, Philippines — Nagpahigayon og inspeksyon sa tanang police stations sa Metro Cebu ang Police Regional Office 7 alang sa kaandam sa kapolisan sa pagsugat sa Bag-ong Tuig.
Si PRO-7 Deputy Regional Director for Administration, Police Brigadier General Ildebrandi Usana maoy nangunay pagtuyok sa Metro Cebu.
Matud ni Usana nga sa iyang pagtuyok sa mga police stations ubos sa Cebu City Police Office (CCPO), Mandaue City Police Office (MCPO), ug Lapu-Lapu City Police Office (LLCPO) iyang nakita nga andam usab ang kapolisan ug naka-alerto kini batok kriminalidad.
“Based on my assessment they are ready pag-conduct crime prevention program,” matud ni Usana.
Dugang pa ni Usana nga nagpahigayon usab sila og massive checkpoint sa tanan nga kadalanan aron sa pagseguro nga walay ilegal nga kalihukan nga mahitabo.
Lakip na usab niini ang pag-monitor sa mga wanted persons nga gilauman nga ang uban niini niuli sa ilang mga mahal sa kinabuhi aron makauban nila kini panahon sa pagsugat sa Bag-ong Tuig.
Sa kinatibuk-an naghinaut si Usana nga zero casualties sa pagsugat sa Bag-ong Tuig. /GMR (BANATNEWS)
- Latest
