Paghimong siyudad sa Balamban paspasan

CEBU, Philippines — Tinguha sa kongresista sa ikatulong distrito sa Lalawigan sa Sugbo, Deputy Speaker Pablo John Garcia, nga mapaspasan ang balaudnon sa paghimong siyudad sa Lungsod sa Balamban karong tuiga.

Buot masuta ni Garcia kung ang Balamban pasado ba sa tanang rekisitos nga aron mahimong siyudad.

“The committee is still gathering the requirements needed on income, the population and the area to make sure that Balamban meets the requirements under the Local Government Code,” matud ni Garcia.

Niadtong Hulyo 8, 2019, si Garcia niduso sa House Bill No. 1574 nga nagtumong sa paghimong component city sa Lungsod sa Balamban.

Ubos sa Section 450 sa Republic Act No. 7160 o ang Local Government Code of 1991, ang usa ka lungsod aron mahimong siyudad kinahanglan nga adunay dili mominus sa P100 milyones nga tinuig nga income sa niaging duha ka tuig, dunay kanit nga yuta nga may gidak-on nga dili mominus sa 100 metro kwadrado ug kinatibuk-ang populasyon nga dili mominus sa 150,000 ka tawo.

Matud ni Garcia nga kung anaa na ang Balamban sa maong nga rekisitos, gusto niya nga mahimo na kining siyudad sa sunod tuig.

“We have to. If we meet all the requirements, we have to fast track it on 2020 because there’ll be no other time. 2021…ang elections will be coming in 2022. It will be difficult to sail through Congress,” sumala pa niya. Gikan sa The Freeman/GMR