Siyam ka vendors gi-ban kay gipaabangan ilang pwesto

CEBU, Philippines — Girekomendar karon sa Cebu City Legal Office ngadto sa buhatan ni Cebu City Mayor Edgardo Labella sa pag-ban sa dili mominos siyam ka mga manindahay sa Cebu City Night Market Bazaar tungod sa pasangil nga ilang gipaabangan ang ilang pwesto.

Ang mga pangalan sa maong mga magpapatigayon gitago usa ning pamantalaan samtang wala pa kini makuhai sa ilang habig

Matud pa ni Atty. Rey Gealon, pangulo sa CLO nga nahinabi sa Banat News, ang siyam ka mga magpapatigayon nalambigit sa unauthorized occupancy, selling ug renting sa mga stalls nga gitagana kanila sa Office of the Market Administrator. Sumala pa ni Gealon, ang uban niangkon nga nipaabang sa ilang mga stalls alang sa ilang kaayohan, samtang ang uban wala manumbaling sa notice to explain base sa opisyal report sa Market Administrator Jonil Matuguina.

Dugang pa ni Gealon, mga matinud-anon nga market vendors ang ilang gikinahanglan nga maoy gilauman sa mayor subay sa panglantaw niini alang sa usa ka malambuon nga night market.

Ang pangulo sa CLO nibutyag unsaon nila pagsiguro kung matinud-anon ba ang mga magpapatigayon sa ilang mga pumapalit nga maoy panalipdan sa mayor kun dili sila matinud-anon sa ilang kaugalingon. /IBM (BANATNEWS)