Kapolisan sa NORPPO gipasidunggan sa PRO-7

CEBU, Philippines — Gipasidunggan sa Police Regional Office (PRO)-7 ang pipila ka polis sa Negros Oriental Provincial Police Office (NORPPO) tungod sa pagkasakmit sa P6 milyones nga balor sa shabu sa Dakbayan sa Dumaguete niadtong nilabay’ng semana.

Lakip sa mga napasidunggan ang direktor sa NORPPO Police Colonel Julian Entoma ug hepe sa Dumaguete City Police Station Police Lieutenant Colonel Wilfredo Alarcon ug ang mga operatiba.

Matud sa direktor sa PRO-7 Police Brigadier General Valeriano De Leon nga nakita niya ang paningkamot ug pagkapursigido sa kapolisan sa Negros Oriental ilabi na sa pagpahigayon sa lawom nga intelligence gathering hinungdan nga nasakmit ang P6 milyones nga balor sa shabu.

Gibutyag ni De Leon nga ang mga drugas nga nasakmit gi-repacked na kini ug andam na unta nga ibaligya ngadto sa mga nagkalainlaing lugar sa Negros Oriental ug silingang mga  dapit.

Si De Leon nagkanayon nga atol sa iyang command visit sa Probinsiya sa Negros Oriental ug Siquijor niadtong nilabay nga semana dili lang ang pagtan-aw sa angayan nga i-improve sa kapolisan apan lakip usab ang pag-ila o pagpasidungog sa mga polis nga  maayo ang performance.

Gipasalig ni De Leon nga hatagan usab og pasidungog ang mga polis ubos sa Central Visayas aron sa pagpataas sa moral sa kapolisan ug tutokan ang kampaniya batok sa ilegal nga drugas.  BDB (BANATNEWS)