Kanhi police escort ni Garbo gipusil

CEBU, Philippines — Usa ka polis nga giingong kanhi closed-in escort ni kanhi Police Lieutenant General Marcelo Garbo ang naangol human napusilan ug naangol usab ang 9 anyos nga babayeng pagumangkon niini niadtong Huwbes sa gabii sa Barangay Basak San Nicolas Dakabayan sa Sugbo.

Giila ang biktima nga si Patrolman Fercival Eborlas, 47, nagpuyo sa maong lugar. Matud ni Police Master Sergeant Nicolo Gonzales, imbestigador sa Mambaling Police Station nga si Eburlas nigawas sa ilang panimalay kay manigarilyo.

Dugang pa ni Gonzales nga sa ilang pagsusi atol sa hitabo daghang mga silingan nga kaestorya si Eborlas ug giingong dunay nakabantay sa usa ka abuhon nga SUV nga nagsige og labay-labay sa ilang duol.

Dangtan pila ka gutlo nagkaanam og pamauli ang mga kaestorya ni Eborlas ug sa dihang naginusara nalang kini nikanaog sa sakyanan ang gunman gikan sa maong SUV ug gipusil ang biktima.

Ang pagumangkong babaye ni Eborlas naatol sab sa paggawas sa balay ug napagan.

“Dunay lalaki nga nikanaog sa sakyanan gipusil dayon ang biktima, moduol pa unta ang gunman pero nakakita man siya nga giprotektahan sa biktima ang bata bisan pa naa siya pinusilan mao nga wala nalang siguro giduol,” matud pa ni Gonzales.

Gisulayan og kuha sa habig sa kapolisan ang pamilya sa biktima apan dili kini mokooperar ug wala usab kini motug-an kung asa nga tambalanan sila gidala apan gibutyag sa pamilya nga luwas na ang duha.

Giingong naigo ra sa paa ang polis ug natapsingan sab ang bata

Nadestino sa Cebu City Police Office City Intelligence Branch si Eborlas panahon ni Police Colonel Romeo Santander.

Dayon nabalhin kini sa Cebu Provincial Police Office ug nahimo sab nga base police sa Police Regional Office 7 ug niadtong Oktubre karong tuiga gidestino kini sa Negros Oriental Provincial Police.

Si Garbo usa sa mga gipanganlan ni Pres. Duterte nga narco-general, pasangil nga gihimakak sa kanhi heneral.  IBM (BANATNEWS)