DepEd mopatuman sa ‘Iwas Paputok’
CEBU, Philippines — Gihangyo sa regional director sa Department of Education 7, Dr. Salustiano Jimenez, ang kadagkuan sa mga tunghaan nga subling balikon ang guidelines mahitungod sa ilang kampanya nga “Iwas Paputok” ilabi na karon nga walay klase.
Kini gumikan kay panahon sa Pasko ug Bag-ong Tuig dili kalikayan nga duna gyuy mga bata nga mopalit o kaha mogamit og mga pabuto.
Matud ni Jimenez nga pahimangnoan gyud ang kabataan nga dili magpataka og pabuto aron kalikayan ang disgrasya sama sa pagkaputol sa tudlo tungod kay nabuthan.
“Karon wala nay klase but we keep on reminding even our parents also nga ila gyud hugtan pagbantay sa ilang kabataan kay lisud na kung mahitabo na ulahi na ang pagbasol,” matud ni Jimenez. Samtang gipahimangnoan ni Konsehal David Tumulak ang mamaligya og pabuto nga gikinahanglan nga makakuha og permit gikan sa Philippine National Police-Firearms and Explosive Office (FEO), Bureau of Fire Protection ug ang Cebu City Government.
Matud ni Tumulak kinsa chairman sa committee on disaster risk management, safety and climate change adaptation sa koseho sa Siyudad sa Sugbo nga mahimo ra mapalit ang mga pabuto sa mga awtorisadong distributor sama sa mga mall apan ang pagbaligya sa mga pabuto hangtud ra sa Disyembre 31, 2019. (BANAT NEWS)
- Latest
