Way re-routing sa Talisay atol sa Misa de Gallo

CEBU, Philippines — Wala kinahanglana sa Dakbayan sa Talisay ang pagpatuman og re-routing sa mga sakyanan samtang magpadayon ang siyam ka adlaw nga Misa de Gallo.

Si Jonathan Tumulak, traffic czar sa siyudad, nibutyag nga walo ka dagku nga simbahan ang anaa sa siyudad nga ilang gipokusan samtang padayon ang Misa de Gallo.

Apan iyang gihulagway nga dili nila kinahanglanon ang re-routing sa mga sakyanan kay kaya ra man sa iyang mga sakop ang pag-asistar sa mga motorista.

Matud pa ni Tumulak iya nang gihatagan og kamanduan ang iyang mga sakop mga sa matag simbahan adunay 10 ka traffic enforcers.

Hinoon siya nitataw nga angay gyud nga abtik ang mga sakop sa City of Talisay-Traffic Operation Development Authority ilabi na sa mga simbahan nga daplin sa karsada sama sa Barangay Tabunok.

Ang pagpakig-alayon sa matag simbahan mao sab ang ilang gibuhat aron hapsay ang ilang pagpatuman sa trapiko.

Gilauman nga daghang katawhan ang modagsa sa simbahan aron sa pagtambong sa Santos nga Misa alang sa nagsingabot nga Pasko. /GMR (BANATNEWS)