Establisamento nga molapas sa ordinansa ipasirado
CEBU, Philippines — Ang kagamhanan sa Dakbayan sa Mandaue mopasirado ug mobakwi sa business permit sa mga establisamento nga molapas sa ordinansa sa siyudad nga naglakip sa pag-ali sa mga sidewalk o mga dalan sa dakbayan.
Ang ordinansa nga gipangamahanan ni Konsehal Jimmy Lumapas ang hingpit na nga giaprobahan sa konseho sa siyudad.
Ang maong ordinansa nagtahas sa buhatan sa Business Permit Licensing Office (BPLO) sa pag-revoke sa business permits sa mga establisamento nga nakahimo og kalapasan.
Si Lumapas, chairman sa committee on transportation, communication and public utilities sa iyang pamahayag nakanayon nga ilang higpit nga ipatuman ang mga lagda nga gilatid diha sa Anti-Abuse of Sidewalks Ordinance.
“It is respectfully submitted that as noble as the objectives of the law are, they (offenders) remain elusive because the penalty is unrealistic”, matud ni Lumapas.
Ubos sa maong ordinansa nga sa unang higayon nga kalapasan makabayad og P3,000 nga multa ug P5,000 alang sa ikaduha o pagkabilanggo sulod sa 15 ka adlaw apan mag-agad hinuon sa hukom nga ipakanaog sa husgado.
Samtang ang mga butang nga naglakip sa mga estraktura nga giguba o mga baligya ang sakmiton kini sa kagamhanan sa siyudad ug kon sakyanan nga maguyod ug madala ngadto sa impounding area ang tag-iya niini maoy mobayad sa towing fee. – /BDB BANAT NEWS
- Latest
