Radaza nipahalipay sa 3 ka board topnotchers

CEBU, Philippines — Gihatagan ni Kongresista Paz Radaza ang tulo ka Oponganon nga naapil sa mga topnotchers sa Naval Architect ug Marine Engineering Licensure Examination nga gipahigayon niadtong Oktubre 2019.

Sila mao si Raymond Espina, Rodette Chynne Naval ug Lawrence Dane Balili.

Si Naval ang nahimutang sa ikapito nga pwesto samtang si Balili ug Espina ang pulos nahimutang sa ikawalo sa maong licensure examination.

Gihatagan ni Radaza og certificate of recognition ang tulo ka Oponganon sa managlahing adlaw sanglit gihimo ang paghatag kang Espina niadtong Lunes ug Biyernes usab sa niaging semana sila si Naval ug Balili.

Si Naval nga nagpanuigon og 21-anyos ang nigradwar sa University of Cebu (UC) Main Campus ug taga Sitio Timpolok, Barangay Babag sa Dakbayan sa Lapu-Lapu.  Samtang si Balili nga nagpanuigon og 21-anyos nga taga Zone Litob sa Barangay Calawisan sa maong dakbayan nigradwar sa iyang Marine Engineering sa UC Main Campus sa Dakbayan sa Sugbo.

Ang laing gihatagan og certificate of recognition ug extra cash gift ni Radaza nga si Espina, 22-anyos didto usab gihapon mogradwar sa iyang kurso sa UC Main Campus sa Dakbayan sa Sugbo ug nagpuyo kini sa Barangay Poblacion sa dakbayan.

Matud ni Radaza nga si Espina maoy usa sa mga scholars ni kanhi kongresista Aileen Radaza nga iyang anak ubos sa “Eskolar sa Kaugmaon” niini kaniadto.

“Sukad pa kaniadto, dagku na gyud ni siya og grades. Mao nga full scholarship gyud ang tabang sa siyudad ani niya,” matud ni Radaza nga ang iyang gipasabot mao si Espina. /GMR (BANATNEWS)