Serging Osmeña day gisugyot ni Labella

CEBU, Philippines – Giawhag ni Cebu City Mayor Edgardo Labella ang konseho sa siyudad nga mopasar og resolusyon nga mag-awhag sa Kongreso nga ideklarar ang matag Disyembre 4 nga special holiday sa tibuok Sugbo.

Kini isip pagpasidungog kang kanhi Senador Sergio “Serging” Osmeña Jr. kinsa nahimugso sa maong petsa.

Kagahapon ang ika-103 ka tuig nga sumad sa adlawng natawhan ni Osmeña nga gisaulog sa Plaza Sugbo nga gitambongan ni Labella, Bise Mayor Michael Rama, Konsehal Donaldo Hontiveros ug Renato Osmeña Jr.

Nitambong sab ang anak nga si Georgia Osmeña ug mga ig-agaw nga sila si Annie Osmeña ug Margot Osmeña Larañaga sa maong kalihukan nga gipasiugdahan sa Cultural and Historical Affairs Commission.

Giawhag ni Labella ang duha ka kongresista sa siyudad nga maoy moduso sa balaudnon.

Gipaambit ni Labella nga sa panahon sa politika ni Serging adunay daku nga pagbag-o sa natad sa ekonomiya ug kalambuan sa Sugbo sama sa pag-ugmad sa North Reclamation Project, Mactan-Mandaue Bridge, ug pagplano sa Mactan-Cebu International Airport.

Subling naghangyo si Labella nga ang Mactan-Mandaue Bridge nganlan og Sergio Osmeña Jr. Bridge.

"So that the generations to come would not forget and be reminded that it was this man, his visionary who made a difference in the lives of Cebuanos because of his economic accruement and his love for Cebu," matud ni Labella.

Naglaum si Labella nga mahatagan og kahulugan ug kamahinungdanon ang pagpasidungog kang Osmeña.

“Ang akong ihangyo ninyo, atong silbihan atong mga katawhan sa siyudad sa labing pagkamatinud-anon, sa labing pagtinarong because I'm sure that the only way that we could make the spirit of Sergio Osmeña Jr. be happy up there in heaven is for him seeing us here nga nagtininuod, nagtarung pagserbisyo sa iyang gipangga nga Dakbayan sa Sugbo,” dugang ni Labella. /GMR (BANAT NEWS)