Hugaw sa CPDRC gihabwa na

CEBU, Philippines — Nasugdan na sa Cebu Provincial Detention and Rehabilitation Center (CPDRC) ang dislodging sa lima ka septic tank lakip na ang chambers niini.

Kini human nga niisyu og cease and desist order ang Environmental Management Bureau (EMB) Central Visayas batok sa CPDRC tungod sa alisngaw sa baho gikan sa maong prisohan.

Matud ni Reynaldo Valmoria, warden sa CPDRC nga niadtong Huwebes sa gabii gisugdan ang dislodging.

Gibanabana nga moabot ngadto sa P300 mil ang magasto sa CPDRC alang sa pagpakuha sa hugaw gikan sa septic tank niini.

Giingong moabot sa P18,000 matag 6 cubic meters ang bayranan sa serbisyo sa Cebu Septic Tank nga maoy nagtrabaho sa dislodging ug sa ilang banabana tulo na ka dagkong truck ang nahabwang hugaw gikan sa prisohan. Nagplano ang CPDRC nga adto na usab makigsabot o mokuha sa serbisyo sa Bonie and Jane Septic Tank Services alang sa padayon nga paghabwa sa hugaw gikan sa prisohan.  – BANAT NEWS