73-anyos patay sa dasmag laing duha angol

CEBU, Philippines — Patay ang usa ka 73-anyos nga lalaki human kini nadasmagi sa usa ka motorsiklo sa Lungsod Santa Fe ug laing usa ang naangol sa Lungsod sa Badian human nadumbuli ang gisakyanan niining motorsiklo.

Insidente nahitabo niadtong Biyernes sa gabii ug kagahapon sa buntag.

Ang namatay mao si Pelagio Baril, taga Barangay Pooc, Lungsod sa Santa Fe.

Matud ni Patrolman Jhonald Estay sa Santa Fe Police Station nga si Baril naglakaw diha kilid sa karsada ug paingon na untang motabok.

Giingong ang karsada tungason kini ug blind curve hinungdan nga si John Alvin Jilobuena, 33, drayber sa motorsiklo wala makabantay sa biktima ug nadasmagan kini.

Dali nga gidala si Baril diha sa Bantayan District Hospital apan girekomendar nga dalhon kini sa tambalanan Sugbo ug giingong dihang  modunggo na unta diha sa Hagnaya Port sa Lungsod sa San Remigio wala na magginhawa ang biktima ug dali kining gidala diha sa Bogo Provincial Hospital apan gideklara kini nga patay na nga naabot sa maong tambalanan.

Base sa imbetsigasyon sa kapolisan sa Lungsod sa Santa Fe nga nabunal ang ulo sa biktima ug nakaangkon usab kini og mga samad sa lawas tungod sa pagkaigo sa motorsiklo.

Si Jilobuena mag-atubang og kasong reckless imprudence resulting to homicide.

Samtang sa Lungsod sa Badian giila ang mga biktima nga sila si Basilio Flores, 28, taga Barangay Kabataan, Lungsod sa Dumanjug ug ang angkas niini nga si Dandrib Sanchez, 30,  taga Barangay Cogon, sa maong lungsod.

Matud ni Police Corporal Terso Sol sa Badian Police Station nga nagbiyahe paingon sa babagatang bahin sa Probinsiya sa Sugbo ang duha sakay sa motor nga gimaneho ni Flores.

Pag-abot diha sa Sitio Dapdap, Barangay Bugas, Lungsod sa Badian nakasugat nila ang usa ka Mitsubishi Delica Van nga gimaneho ni Jonas Nalzaro, 46-anyos, lumad nga taga Augusan, Cagayan de Oro City, Misamis Oriental kinsa paingon unta sa Dakbayan sa Sugbo.

Matud ni Sol nga kalit nga ni-overtake si Nalzaro diha sa kurbada nga bahin ug wala makabantay nga adunay kasugat nga motorsiklo.

Giingong nadumbolan ni Nazalro ang motorsiklo nga gisakyanan sa duha ka biktima ug nalabay si Sanchez diha sa karsada ug nakaangkon kini og mga pangos sa lawas samtang si Flores gituohan nga nadugmok ang tuhod niini tungod sa ka kusog sa impact.

Ang mga biktima daling gidala ngadto sa tambalanan ug si Nalzaro ang gitanggong kini diha sa Badian Police Station. (/BDB)(BANATNEWS)