Piyesta sa opon hapsay, malinawon

CEBU, Philippines – Hapsay ug malinawon ang tinuig nga piyesta sa Birhen sa Regla sa Dakbayan sa Lapu-Lapu.

Si Police Senior Master Sergeant Jeofrey Managase sa Presinto 3 sa Lapu-Lapu City Police Office niingon nga gikan sa sayo sa buntag sa Nobiyembre 20 wala sila makatala sa ilang blotter og mga panghitabo sa krimen.

Matud niya nga sa maong adlaw sa kasaulogan ang sagad sa ilang natala nga panghitabo mao ang panagsaghid sa nagkalainlain nga mga sakyanan.Higpit ang pag-monitor sa kapolisan pinaagi sa pagpatrolya sa nagkalain-laing lugar sa dakbayan.

Si Police Master Sergeant Jerome Espinosa sa Presinto 4 sa LLCPO niingon nga sa mga barangay nga ubos sa ilang hurisdiksyon wala sab silay natala nga krimen. Si Police Colonel Clarito Baja, direrktor sa LLCPO, nipakatap sa 300 ka polis apil na ang mga force multipliers nga naglakip sa mga barangay tanod.

Higpit nga gibantayan ang National Shrine sa Birhen sa Regla nga maoy gihugopan sa mga deboto nga mga Katoliko.

Samtang si Auxiliary Bishop Midyphil Biliones sa Archdiocese of Cebu niawhag sa mga magtutuo nga nitambong sa pontifical mass sa kapistahan sa Mahal nga Birhen sa Regla nga dili mawagtangan sa paglaum bisan sa mga hagit ug problema nga ilang giatubang.

Kini ang unod sa wali sa obispo kinsa nihinumdum usab sa ikaunom ka tuig sa kamatayon sa iyang inahan atol sa kapistahan sa Mahal nga Birhen sa Regla.

Matud ni Biliones nga bisan silang kaparian dili gawasnon sa mga pasuway ug krisis sa kinabuhi diin siya nakasinati niini human sa kamatayon sa iyang amahan ug nag-inusarang igsuon.

Sumala pa ni Biliones nga adunay higayon nga nibati siya og pagpangluod sa iyang pag-ampo ngadto sa Mahal nga Birhen ug sa Ginoo bisan nagpadayon siya sa iyang obligasyon sa iyang pagka-pari tungod sa iyang mga pag-ampo nga wala gihatag nga malugwayan pa ang kinabuhi sa iyang inahan.

Dugang ni Biliones nga atol sa iyang pagbiya sa pag-ampo adunay nakapukaw kaniya pagpabalik sa iyang pagrosaryo pagbalik sa dihang nakita niya ang usa ka pulong atol sa iyang pagbiyahe nga adunay hulagway sa Mahal nga Birhen Maria nga nag-ingon sa binisaya pa dinhi lang ako ang tinuod mong inahan. Matud niya nga sukad niadto ang maong pulong maoy nakapadasig kaniya pagbalik gikan sa iyang mga gibating kahingawa, kasubo ug kabalaka, ug kaguol.

Si Biliones nitug-an nga angay dili magpakawala sa paglaum ang katawhan bisan sa ilang mga kasakitan tungod kay ang Mahal nga Birhen uban sa iyang anak anaa kanunay motabang.

Ang homiliya ni Biliones nakapa-emosyonal sa pipila ka nanambong sa pontifical mass. (/GMR)(BANAT NEWS)