Rerouting atol sa piyesta sa Opon

CEBU, Philippines — Higpit nga ipatuman sa City Traffic Management System sa Lapu-Lapu ang pagdili sa pagpataka og parking sa mga pribadong sakyanan sa atol sa kapistahan sa Birhen sa Regla karong Nobiyembre 20 ug 21.

Ila sab gipahibawo ang pagsirado sa pipila ka dalan nga magsugod sa alas 4:30 sa kaadlawon sa petsa 20 diin inigka hapon ang prosesyon sa imahen sa Mahal nga Birhen palibot nga mga dalan sa Barangay Poblacion, Pajo, Babag hangtud mobalik sa simbahan.

Sirado ang mga dalan nga naglakip sa Mantawe Rd. ug dalan Lopez Jaena, Ompad, Mangubat, S. Osmeña, ug eskina G.Y. dela Serna St. paingon sa eskina Lopez Jaena St., J.P. Rizal ug B.M. Dimataga St. sa Barangay Gun-ob.

Himoong one-way nga dalan atol sa adlaw sa piyesta ang Guiwanon paingon sa dalan Dad Cleland, P. Rodriguez hangtud na sa eskina sa Looc nga manukad sa eskina sa Ompad ug paingon na ngadto sa P. Rodriguez dapit sa City Central School.

Samtang ang mga sakyanan nga mopaingon sa Virgen dela Regla Church nga gikan sa Dakbayan sa Mandaue, MEPZ 1 ug 2 moliko sa tuon lahos sa parking area sa bakanteng luna sa paglikay sa panaghuot sa kadalanan sa adlaw sa kapistahan. (/GMR)(BANATNEWS)