Beep mosulod sa Talisay

CEBU, Philippines – Bukas si Mayor Gerald Anthony “Samsam” Gullas, Jr. sa Dakbayan sa Talisay nga mosulod ang Beep sa pagpamasahero sa siyudad.

Si Gullas nagkanayon nga ang Persano Corporation interesado nga ang Beep nga padayon nga nag-operate sa Siyudad sa Sugbo ang mobutang usab og rota sa Talisay. Gibutyag ni Gullas nga duha ka rota ang gipadayag sa maong kompaniya diin ang unang rota mao ang Wilcon paingon sa SM City, Cebu nga moagi diha sa N. Bacalso samtang ang ikaduha anha diha Barangay Linao McDonalds paingon sa Parkmall, Mandaue nga moagi diha sa Cebu South Coastal Road (CSCR). Matud ni Gullas nga pabor siya sa ikaduha nga rota tungod kay ang N. Bacalso nibalik naman ang kahuot sa trapiko tungod kay ang mga bus gipaagi na sa maong karsada pagkahuman sa underpass sa Barangay Mambaling.

Hinuon matud usab ni Gullas nga maminaw siya sa opinyon sa iyang bise mayor, konsehales ingon man mga department heads, kabarangayan ug sa katawhan. Sa laing bahin, gisugdan na sa niaging gabii sa Department of Public Works and Highways (DPWH) ang mga badlis diha sa karsada nga maoy mopakurog sa sakyanan nga moagi di ha sa Cebu South Coastal Road (CSCR) sa Barangay San Roque, Dakbayan sa Talisay.

Kini aron ang mga drayber nga gipangduka makamata ug malikayan ang disgrasya. (/BDB)(BANAT NEWS)