Anak niapas sa papa sa prisohan

CEBU, Philippines – Sikop ang 19-anyos nga lalaki sa buy-bust operation sa Cebu City Police Office City Intelligence Branch sa Sitio Bliss, dalan A. Lopez, Labangon.

Giila ang dinakpan nga si Arsley Jylle Abangan nga nagpuyo sa maong lugar, kinsa nasakmitan og kapin sa P700 mil nga balor sa shabu.

Matud ni CIB chief, Police Major Randy Caballes, nga gikonsiderar nga regional high level target sa Police Regional Office 7 ang dinakpan tungod sa dinagko ug lapad nga pagpamaligya og ilegal nga drugas.

Giangkon sa dinakpan nga naa sa prisohan ang kontak niya sa supply ug igo ra usab siya hatdan.

Kasamtangang naa sa Cebu City Jail ang iyang amahan ug igsuon sa iyang amahan tungod usab sa kasong pagpamaligya sa ilegal nga drugas.

“Iyang mama wala kahibalo daw nga namaligya og drugs iyang anak,” matud ni Caballes.

Samtang lima ka durugista ang gipangsikop sa managlahing operasyon sa Dakbayan sa Talisay sa niaging adlaw.

Unang operasyon gihimo sa Sitio Malipayon Zone 3, Barangay Biasong diin nasikop sila si Edwin Rabaya, 39, kinsa subject sa buy-bust operation.

Lakip sa nasikop nga naatlan sa mga operatiba mao sila si Dinise Carriaga, 37; Jovito De la Cuesta, 42, ug Leo Romano, 29, pulos taga Barangay Cansojong.

Nakuha gikan kanila ang shabu nga gibana-banang nga mokantidad og dul-an sa P4 mil.

Nasikop sab si Jonard Abarquez, 33, sa Sitio Panaghiusa, Barangay Tabunok, kinsa nakuhaan og lima ka pakete sa shabu.

Sa laing bahin gitanggong sa selda sa kapolisan ang babayeng pusher nga nadakpan sa Barangay Poblacion, Compostela ug ang kauban nga lalaki nga nakaeskapo nadakpan dihang gialarma sa pagdala og nagkadaiyang kalibre sa armas.

Si Police Captain Ian Macatangay, hepe sa Compostela Police Station, niila sa suspek nga si Analee Cuesta, hingkod, nagpuyo sa maong dapit, kinsa nasakmitan og mokabat sa P1.1 milyones nga kantidad sa shabu ug ang kauban nga lalaki nga si Joel Lawas, 44, nakamatikod sa mga polis mao nga dali nga nakadagan.

Apan matud ni Macatangay nga alas 11 pasado sa niaging gabii gialarma sa Barangay Poblacion ang armadong lalaki maong nadakpan si Lawas ug nasakmitan og usa ka kalibre .38 ug usa ka kalibre .357 nga puno sa mga bala.

Dugang nadakpan ang duha ka pusher sa Barangay Semboryo, Lungsod sa Liloan nga giila nga sila si Regie Sugarol, 36; ReJoys Mata, 28-anyos.

Si Police Major Danilo Colipano, hepe sa Liloan Police Station, niingon nga nasakmit gikan sa mga dinakpan ang 16 ka gagmay nga pakete sa shabu ug P1,000 nga buy-bust money. (/GMR)(BANAT NEWS)