Mayor gi-reklamo sa konsehal

CEBU, Philippines – Gireklamo diha sa Office of the Ombudsman for the Visayas si Santa Fe Mayor Ithamar Espinosa sa usa sa iyang konsehal sa lungsod kay matud pa nanghilabot kini sa kaso sa iyang pangumangkon ug nangasaba sa kapolisan sa lungsod sa Bantayan.

Ang pag-umangkon ni Espinosa nga si RapRap Zaspa nga anak sa barangay kapitan sa Barangay Pooc sa maong lungsod gidakop ug gipriso sa mga polis sa Bantayan Police Station tungod sa pasangil nga na-hit and run niini ang tawo ni Santa Fe Municipal Councilor Joan Gay Nepangue nga mao ang reklamante karon batok sa mayor. Sa giduso nga reklamo ni Nepangue ngadto sa Ombudsman for the Visayas iyang gipasanginlan ang mayor og criminal harassment, workplace bullying, unjust vexation ug grave abuse of authority.

Matud pa sa reklamo ni Nepangue, niadtong Septiyembre 19 ning tuiga nadasmagan sa pagumangkon ni Espinosa si Marivic Ariesgado ug duh aka menor de edad. Si Ariesgado kanhi empleyado sa konsehal.

Sumala pa nga naputol ang duha ka kumagko ni Ariesgado sa maong aksidente. Apan giingong gibiyaan kini sa Zaspa. Usa ka pedicab ang naghatud kanila sa tambalanan.

Si Zaspa nadakpan sa follow-up operation ug gidala sa Bantayan Police Station kay didto man nahitabo ang aksidente.

Apan matud pang Nepangue diha sa iyang reklamo, pagsusi nila sa Bantayan Police Station giingong miabot sila si Mayor Espinosa uban ang iyang mga bodyguard ug nisulod sa investigator’s office ug sunod nga naabot ang inahan ni Zaspa nga si Kapitan Rafaelita Zaspa.

“A few minutes Mayor Espinosa arrived in his Fortuner with his bodyguard. They went inside the investigator’s office. Five minutes later Barangay Captain Rafaelita Zaspa came in screaming and yelling ‘Mga yawa kamo nganong inyo gi detain akong anak?’” tipik sa reklamo ni Nepangue.

Aron paglikay sa gubot, niuna og pamauli ang kampo ni Nepangue, apan giingong samtang nagbiyahe sila nakabantay silang gisunod-sunoran sila og motorsiklo, mao nga ilaha kining gipa-blotter sa Sta. Fe Police Station.

Apan si Espinosa sa pakighinabi sa Banat News kusganong mihimakak sa mga pasangil sa kampo ni Nepangue.

“Ug nangasaba ko, nganu mangasaba ko? Wala man gani ko nisulod, diri ra man gani ko sa sakyanan sila ra gani ako gipakaestorya didto. Wala man gani jud ko magapil-apil,” matud pa ni Espinosa. Matud sa mayor ang iyang pagumangkon mitawag kaniya ug mi-request og ambulansiya kay nakadasmag kini nga kinahanglang dad-on sa tambalanan.

“Siya (Nepangue) ang naguna, siya ang nigamit sa iyang pagka konsehal, naggamit siya sa iyang mga tawo mao na ang statement sa mga police,” dugang pa ni Espinosa

Matud ni Espinosa, way sala iyang pagumangkon sa pagmaneho kay kompleto kini sa mga papeles samtang ang nadasmagan dili. “Kompleto ako pagumangkon naay lisensya, rehistrado ang motor apan katung iyang nakadasmag kay walay helmet, walay lisensya ug wala sad rehistro ang motor,” pasangil pa ni Espinosa samtang iyang gihimakak nga gipasundan niya og tawo ang konsehal.

Gipadayag ni Espinosa nga andam siyang atubangon ang reklamong gipasaka batok kaniya. (/IBM)(BANAT NEWS)