Namusil kay gisungog nga ‘buang’
CEBU, Philippines — Nasikop sa kapolisan ang kanhi security guard ug karon gatrabaho isip usa ka porter human gipasanginlang nagpusil sa usa ka construction foreman nga giingong nagsige og panungog kaniya niadtong Domingo sa buntag diha sa Pasil Fishing Port.
Ang suspek nga si Rolando Toradio, 37, mibutyag sa kapolisan nga ang biktima nga si Amador Santing, 50, magsige og tawag kaniya og ‘buang.” “Sige’g pangantyaw nako. Kantyawan ko niya nga buang kuno ko,”sigon ni Toradio ngadto sa kapolisan.
Sa adlaw sa pagkahitabo, si Toradio miingon nga gihinganlan na sab siya og buang sa biktima mao nga wala na kini makaagwanta ug napusilan niya kini.
Giangkon sa suspek ngadto mga polis nga nakasuyop siya og duha ka paketeng shabu sa gabii sa wala pa nahitabo ang krimen.
Si Police Staff Sergeant Roberto Emperado sa San Nicolas Police Station miingon nga ilang nadakpan si Toradio samtang kini naglakaw diha sa Forbes Bridge sa Barangay Ermita, 15 minuto human dunay nisumbong sa iyang pagpusil sa biktima. (/IBM)(BANATNEWS)
- Latest
