Nakig-away sa kapuyo naghikog

CEBU, Philippines — Patay ang usa ka lalaki nga gituohang naghikog pinaagi sa paghigot og pisi sa iyang liog sa sulod sa giabangang panimalay sa Sitio Baha-Baha, Tugbongan, Lungsod sa Consolacion ug alas 10:52 na niadtong Huwebes sa gabii nadiskubrehan.

Si Police Staff Sergeant Rhexter Armenion sa Consolacion Police Station niila sa namatay nga si Jolito Argoncillo, 24, taga Lungsod sa Sogod.

Matud ni Armenion nga sa sayo sa hapon sa maong adlaw maoy namatikdan ang mainiton nga panag-away ni Argoncillo ug sa gikapuyo niining babaye.

Gituohang nahitabo ang paghikog dihang nag-inusara nalang kini sa gipuy-an.

Hinoon si Armenion niingon nga ilang gitambagan ang mga sakop sa pamilya sa namatay sa pagpaubos sa autopsy sa patay’ng lawas sa pagsuta kun may foul play ba o wala ang kamatayon niini.

Sa pikas bahin gidugang ni Armenion nga nagpabilin pa gihapon sa sulod sa tambalanan kadtong security guard nga naghikog pinaagi sa pagpusil sa iyang tampihak ginamit ang kargada nga kalibre .38 nga armas.

Gitataw niya nga ang maong guwardiya nga si Junrey Mangubat Corbo, 28, taga Barangay Pulpogan sa maong lungsod ang wala usab magkasinabtanay ug sa iyang uyab nga hinungdan sa gihimo niining paghikog. (/GMR)(BANATNEWS)