Drag racing sa Talisay nagpadayon

CEBU, Philippines – Bisan pa man sa bahad sa kapolisan kaniadto nga dakpon ang magpahigayon og drag racing apan nagpadayon pa gihapon kini.

Si Police Major Gerard Ace Pelare, hepe sa kapolisan sa Siyudad sa Talisay, wala katago sa ilegal nga kalihukan gumikan usab sa nadawat niya nga impormasyon gikan sa nahasol nga mga tawo. Ang magpahigayon og drag racing anha magtapok sa gasolinahan sa South Road Properties (SRP) sa may Barangay Cansojong.

Ang katawhan hagbay ra nga nangreklamo sa maong kalihukan gumikan sa saba nga mga tambutso sa motor matag ipahigayon ang lumba.

Si Pelare niingon nga gawas nga walay permit ang lumba, dili sab sakto nga anha sa karsada magpahigayon og lumba.

Matud niya nga seryusohon nila ang pagdakop niining mga tawo nga moapil sa maong kalihukan.

Siya nitataw nga ang madakpan mag-atubang gyud og daghang kaso.

Ang ilegal nga lumba kasagaran gyud himoon sa alas 10 sa gabii hangtud na sa kaadlawon.

Hinoon gihangyo gihapon ni Pelare ang mahiligon og lumba nga ibutang sa lugar ang ilang hilig aron dili maalanganin sa balaud. (/GMR)(BANAT NEWS)