Budget hearing sa Kapitolyo gisugdan
CEBU, Philippines – Gisugdan na hunta probinsiyal pinaagi sa committee on budget and appropriations ang budget hearing sa matag departamento sa Kapitolyo sa giduso nga budget sa tuig 2020.
Una nga gituki kagahapong adlawa ang budget sa Provincial General Services Office nga niduso og P240.1 milyonesdiin nisaka gikan sa P158.7 milyones sa karong tuiga.
Matud ni Bernard Calderon, hepe sa PGSO, nga nisaka ang ilang budget tungod sa P82 milyones alang sa pag-outsource sa mga empleyado sa Kapitolyo. Sunod nga gituki mao ang Provincial Health Office diin ang buhatan nangayo og P620 milyones sa tuig 2020 diin walay labot pa ang P1.9 bilyones nga proposed budget sa 16 ka provincial ug district hospitals alang sa pag-upgrade sa mga pasilidad.
Gawas sa PGSO ug PHO, gituki sab kagahapon ang gipangayo nga pondo sa pipila ka buhatan sama sa Provincial Engineering’s Office nga P83.5 milyones, Planning and Development Office nga P29.3 milyones ug Provincial Veterinary Office nga P49.9 milyones.Gikatakdang humanon ang budget hearing sa Nobiyembre 9 sa komitiba nga gipangulohan ni Bokal Glenn Anthony Soco. (/GMR)(BANAT NEWS)
- Latest
