Guwardiya nagpusil sa kaugalingon

CEBU, Philippines — Kritikal ang kahimtang sa security guard sa usa ka establisemento nga nahimutang sa Barangay Pulpogan, Lungsod sa Consolacion nga gituohang nagpusil sa iyang kaugalingon ginamit ang kargada niining armas nga kalibre 38 alas 12 pasado sa udto atol sa kalag-kalag.

Si Police Staff Sergeant Rhexter Armenion sa Consolacion Police Station niila sa naangol nga guwardiya nga si Junrey Mangubat Corbo, 28-anyos, ug nadestino sa pagbantay sa usa ka hardware sa maong lugar.

Matud pa ni Armenion nga ang laing guard on duty nga nakakaplag sa iyang kauban nga nagkadugo na ang dali nga nangayo og panabang sa nilabay nga patrol car hinungdan nga dali kining gihatud sa Vicente Sotto Memorial Medical Center sa Dakbayan sa Sugbo.

Dugang pa ni Armenion nga ang kauban nga guard on duty niasoy ngadto kanila sa kapolisan nga sa wala pa mahitabo ang maong guwardiya nakasugilon pa kini ngadto kaniya sa gibati niining kaguol tungod sa wala na pagsinabtanay niini ug sa iyang hinigugmang babaye. Sa paglabay sa pipila ka oras human sa ilang panagsulti maoy nabati niini ang lanog nga boto sa armas ug dihang gisusi nakita na lang niini ang maong guwardiya nga naligo na sa iyang kaugalingong dugo tungod sa samad pinusilan sa tuo niining tampihak. Hinuon si Armenion niingon nga mohimo pa sila og dugang imbestigasyon sa maong hitabo alang sa pagsuta kun may foul play ba o wala ang maong pagpamusil nga nahitabo. (/GMR)(BANATNEWS)