Sonny O: Buhi pa ko
CEBU, Philippines — Gipadaplin sa beteranong politiko sa Sugbo ang mga gihulagway niyang “tsimis” nga nag-ingong namatay na kini atol sa gipatawag niyang press conference kagahapong adlawa.
Si kanhi senador, congressman ug Toledo City mayor John Henry Osmeña miatubang sa media aron ipamatuod nga dako siyang buhi, sukwahi sa mga gipakatap nga mga estorya sa gihulagway niyang iyang mga kritiko ug mga kaaway.
Apan giangkon niya nga duna siyay stage 2 cancer apan matud pa sa iyang mga doktor nakauyon kini sa pagtambal nga gihimo. “I am sorry to disappoint my enemies, but I am very much alive,” miingon si Osmeña.
Sa ulahing bahin sa miaging bulan, mikatap ang mga estorya ilabi na sa Toledo City bahin sa pagkamatay sa kanhi mayor sa maong siyudad.
“I have chemotherapy every 21 days and my last is this month. So far doctor says I am responding very well and there’s nothing to worry,” pagklaro pa niya.
Giingon nga nadiskubrehan ni Osmeña nga siya adunay cancer kaniadtong Hulyo ning tuiga lang.
Dugang pa niya nga bisan duna siya niining sakita wala niya talikdi ang panerbisyo sa publiko. (/IBM)(BANATNEWS)
- Latest
