20 ka balay naugdaw sa kandila
CEBU, Philippines — Giingong kandila sa altar nga nataligam-an ang hinungdan sa sunog sa may Sitio Lusimba, Barangay Basak San Nicolas ning Dakbayan sa Sugbo niadtong Biyernes sa gabii atol sa Adlaw sa mga Santos.
Nadawat sa kabomberohan ang alarma sa sunog alas 7:43 sa gabii bahin sa panimalay nga nasunog. Nakontrolar nila kini paglabay sa dul-an usa ka oras.
Ang sunog nagsugod sa panimalay nila Boboy ug Ann Del Valles. Sumala pa nga ang kabomberohan nakadawat og report nga nabiyaan nga kandila maoy rason sa pag-ulbo sa kalayo.
Ang sunog daling mikatap sa mga silingang mga balay ug milamoy sab sa dili momenus 20 ka panimalay sa maong dapit.
Gibanabanang mokabat P160 mil ang danyos sumala pa ni Fire Investigator Senior Fire Officer 3 Hermes Molina.
Ang BFP-7 mopatawag sa tag-iya sa panimalay ug sa mga saksi alang sa himuong imbestigasyon.
Matud ni Molina naglisod sila sa pagpaduol sa lugar tungod kay sudlonon kaayo ug hagip-ot kaayo ang dalan padung sa nasunogan.
Wala hinuoy natala nga nakalas o naangol sa hitabo gawas lang sa duha ka tawong nireklamo tungod kay naglisod og ginhawa tungod sa baga nga aso sa maong sunog. (IBM)(BANATNEWS)
- Latest
