Mga sam-ang gidagsa na sa mga tawo sukad kagabii

CEBU, Philippines — Kagahapon pa lang gidagsa na sa mga tawo ang mga sam-ang sa Dakbayan sa Sugbo nga gustong modagkot ug mohalad og misa alang sa ilang mga nitaliwan nga kabanay subay sa pag-obserbar sa kalag-kalag. Sa Calamba Cemetery hugot nga seguridad ang gipatuman sa mga law enforcement agencies inabagan sa mga force multipliers ug mga barangay tanod.

Wala nay mga sakyanan nga maka-park gawas sa sam-ang aron dili makabalda sa dagan sa trapiko ug sa dayon sulod sa sementeryo ang mga bag susihon gyud aron wala’y makalusot nga ginadili sama sa ilimnong makahubog, mahait nga hinagiban ug uban pa.

Si Police Captain Cesar Alcompañado, deputy commander sa Police Station 6, nipahimangno sa publiko mahitungod sa mga gidili sulod sa sam-ang.

Samtang ang caretaker sa Calamba Cemetery nga si Antonio Bagiuo niingon nga kusog na sab ang halin sa pagpasuga nila nga nagkantidad og P300 samtang mga buwak dunay P10, P20 ug ang mga kandila dunay tag P7, tulo P10 ug dunay tag P5.

Ang mga tawo nga mosulod sa sam-ang gipahinumduman sab sa paghipos sa ilang basura ug dili kini biyaan ingon man ilabay bisan asa.

Sa Dakbayan sa Mandaue higpit sab nga gibantayan ang nagkadaiyang sementeryo.

Si Senior Superintendent Jonathan Abella, direktor sa Mandaue City Police Office, nidestino sa iyang mga sakop sa mga sementeryo nga nahimutang sa Barangay Guizo, Pagsabungan ug Canduman diin dunay pribadong sementeryo.

Ang traffic division sa MCPO higpit sab nga nagbantay sa kadalanan alang sa hapsay nga dagan sa mga sakyanan kauban sa mga traffic enforcers ug mga barangay tanod. (GMR)(BANATNEWS)