Vinluan girelibohan

CEBU, Philippines — Girelibohan sa iyang pwesto si Cebu City Police Office Director (CCPO), Police Colonel Gemma Vinluan sugod niadtong adlaw nga Miyerkules alang sa himuong imbestigasyon sa posibleng mga lapso mahitungod sa pagpatay kang Clarin, Misamis Occidental Mayor David Navarro  sumala pa ni Police Regional Office-7 Director Valeriano De Leon.

Si Vinluan hulipan una ni Deputy Regional Director for Operations, Police Colonel Geovanie Maines, kinsa maoy unang gitudlong mangulo unta sa gibungkag nga Special investigation Task Group (SITG) Navarro human ang imbestigasyon gitugyan ngadto na sa National Bureau of Investigation-7.

Si De Leon miklaro hinuon nga ‘administratively relieved’ si Vinluan aron madali siyang makatubag kun gikinahanglan sa imbestigasyong gihimo sa NBI subay sa mando ni Pres. Rodrigo Duterte.

“The President's instruction to turn over the investigation to the NBI is a welcome development. It will provide a perception of impartial investigation sparing us of suspicion of possible whitewash,” matud pang de Leon.

“Meantime, I issued the administrative relief of Colonel Vinluan to make her available of the investigation being conducted,” dugang pa sa heneral.

Si Vinluan sa gipadala niining text message miingon nga wala na siya mahibulong niini tungod kay daan naman siyang andam motubag sa imbestigasyon.

“That is expected kasi even sa previous interview sa akin, sinabi ko narin na the Cebu City police is open for investigation and to find out if we have lapses during the incident,” matud niya.

Ang NBI nagsugod na sa ilang imbestigasyon samtang gimandoan usab ang mga kauban sa mayor atol sa ambush.  Si Vinluan gibutang una karon sa floating status diha sa Regional Admin Holding Unit.

“Kapag matapos na ito at titingnan natin yung recommendation if there are any lapses on her part eh baka tuluyang malipat, kung wala naman ibabalik naman,” si De Leon  mipasabot.

Si Navarro padung na unta pasakaan og kaso ngadto sa piskalya tungod sa reklamo sa duha ka masahista sa dihang gibabagan og puti nga van ang patrolcar nga gisakyan niini ug napulo ka armadong mga lalaki ang pugsanong mibunlot  kaniya gikan sa sud ug girakrakan sa ulo.

“Lapses are possible but not intentional,” sumala pang Vinluan sa mga nahauna niining interbyu. Apan si Duterte mipadayag og pagduda sa maong hitabo maong gipasa niya ang imbestigasyon sa NBI-7.

Dunay mga nanggawas nga reports nga konektado si Navarro sa Parojinog ug Alferez robbery groups nga nalambigit sa mga dagkong pagpanulis ug illegal-drug trade. Butang nga gihimakak sa iyang mga kabanay. Sumala pang de Leon karong ang NBI na maoy mopadayon sa imbestigasyon matutukan nila ang ubang mga kampanya kontra krimen ug illegal nga drugas.

Sa pikas bahin, nagtoo si Cebu City Mayor Edgardo Labella nga ang pagrelibo kang Vinluan makapatangtang sa mga pagduda nga bias unya ang imbestigasyon.

Si Labella miingon nga nakahinabi na niya si Maines ug gisultihan kabahin sa iyang mga gustong mahitabo atol sa Kalag-Kalag.

Kalabot gihapon sa kampanya kontra kriminalidad, human gitudlo ni Duterte si Labella isip Regional Peace and Order Council chairman sa rehiyon, ang mayor misaad nga pangusgan niya ang kampanya batok kriminalidad sa rehiyon ilabi na ang illegal nga drugas.

"That's why I said this over and over again. That for the law-abiding citizens, Cebu City is a very safe place to stay but for those who are involved in various forms of criminality, especially illegal drugs, better stay out of Cebu City," pagklaro pang Labella human sa mga pamahayag nga di na luwas puy-an ang dakbayan tungod sa mga nahitabong mga pagpatay.

"To those who are thinking of continuing their illegal activities, especially drug-related, better think twice. Better look for another place to stay,"pasidaan pa sa mayor. (IBM)(BANATNEWS)