Daplin sa karsada patindahan

CEBU, Philippines — Hatagan og higayon ang mga manindahay nga makapaninda daplin sa karsada sa may Calamba Cemetery sa Dakbayan sa Sugbo sugod sa Oktubre 30 hangtud sa Nobiyembre 2 atol sa kalag-kalag. Kini ang gipahibawo ni Raquel Bohol-Arce, hepe sa Prevention, Restoration, Orderly, Beautification, Enhancement (PROBE) Team nunot sa ilang tulo ka adlaw nga notisya sa pagpahawan sa lugar subay sa road clearing nga gimando sa nasudnong kagamhanan.

Ang mga manindahay sa lugar unang nipadayag sa ilang kabalaka nga dili sila tugutan nga makapaninda ilabi na nga kausa ra kini matag tuig ang kalag-kalag.

Samtang gipaneguro sa tagdumala sa Cebu South Bus Terminal nga dili maghuot ug hapsay ang mga pasahero nga manguli sa tagsatagsa nila ka probinsiya atol sa kalag-kalag.

Si CSBT Manager Carmen Quijano nipakita sa mga sakop sa media sa ilang mga pagpangandam nga gihimo.

Lakip niini ang gipamutang nga lingkuranan ug tulda sa likod diin adto molingkod ang mga pasahero kung magsobra na ang waiting area sa terminal. Nalipay si Quijano nga si Gobernador Gwendolyn Garcia dunay ipadala nga eksperto sa pagdeterminar kun pila ka blue guards ug Civil Security personnel ang idugang sa CSBT.

Lakip sa nangandam ang mga bus drivers ug operators diin sumala pa ni Ronie Escura, driver sa Ceres Bus, nga istrikto ang ilang kompaniya maong makaseguro ang mga pasahero nga luwas ang ilang pagsakay. Ang mga drivers gipaubos sa drug test ug uban pa ug ang mga bus kondisyon pirme tungod kay dunay tigsusi niini matag abot sa terminal. GMR (BANAT NEWS)