TCJ nadugangan og duha ka buildings
CEBU, Philippines —Ang bag-ong gi-turnover nga duha ka building sa Talisay City Jail sa male dormitory diha sa Barangay Maghaway, Dakbayan sa Talisay ang nakatabang nga makuhaan ang kahuot sa maong prisohan.
Kini ang gitug-an ni Jail Senior Inspector Crisyrel Awe, jail warden sa TCJ male dorm nga nahinabi sa Banat News.
Matud ni Awe nga ang duha ka building usa niini upat ka andana ang gihabogon ug ang laing usa duha ka andana diin gisugdan na nila kini og gamit.
Matud usab ni Awe nga ang mga building nakatabang kini nga maloag ang kahuot sa Persons Deprive with Liberty (DPL).
Kaniadto cottages ang gipuy-an sa mga PDL diha sa TCJ diin ang maong cottages aduna lang kini 200 ngadto sa 300 ka tawo ang kapasidad.
Gibutyag ni Awe nga sa pagkakaron aduna sila’y 1,180 ka PDL diin tungod sa ilang bag-ong pasilidad mahimo pa sila nga makadawat og mga resident hangtud sa 1,300 ngadto sa 1,400.
Giingong 80 ngadto sa 85 porsyento sa mga PDL nga anaa sa ilang facility adunay mga kaso sa ginadili nga drugas ug 15 ngadto sa 20 porsyento ubang klase sa krimen.
Gawas sa bag-ong building, adunay gidesinyo ang mga opisyal sa TCJ nga “mini park” diin panahon sa dalaw adto magtagbo ang PDL ug ilang pamilya ug adunay kahigayonan ang mga kabataan nga makaduwa-duwa. BDB (BANAT NEWS)
- Latest
