Pribadong sementeryo pasirad-an

CEBU, Philippines —Gimando sa Cebu City Legal Office ang pagpasira sa pribadong sementeryo nga giingong wala’y permit atbang sa pangpublikong sementeryo sa Barangay Pardo.

Ang Business Permit and Licensing Office ang nirekomendar sa pagpasira sa sementeryo.

Ang pangulo sa BPLO nga si Jared Limquiaco nagkanayon nga human sa sagunson nga ocular inspection ug usa ka clarificatory conference, namatud-an nga ang sementeryo walay permit gikan sa siyudad.

Apan si Limquiaco niingon nga wala nakit-i ang tag-iya sa maong pribadong sementeryo.

Samtang ang Department of Public Services (DPS) nagtugyan na og mga tiglimpyo sa lainlaing mga sementeryo sa Dakbayan sa Sugbo alang sa umaabot nga kalag-kalag.

Ang mga sementeryo nahimutang sa Talamban, Calamba, Carreta, Mabolo ug Labangon diin kapin sa 200 ka tiglimpyo ang gitahasan niini.

Ipakatap sab ang portable toilets nga gipamalit sa Dakbayan sa Sugbo isip pagpangandam sa Sinulog Festival. Gawas sa paglimpyo, ang DPS nangilis sab og bag-ong mga bombelya sa suga sa mga poste sa sementeryo.

Si Engineer Joel Biton, pangulo sa DPS, nihangyo sa publiko nga dili magpataka og labay sa basura.

Ang DPS magbutang sab og mga tawo nga mobantay sa mga hotspot na lugar aron modakop sa mga dili motuman sa balaod sa husto nga paglabay sa basura.

Multa o serbisyo sa komunidad ang ipahamtang sa masakpan. GMR (BANAT NEWS)