19-anyos nga regional level watchlist sikop
CEBU, Philippines —Dul-an sa usa ka milyon ka pesos nga balor sa drugas ang nasakmit sa kapolisan sa buy-bust operation sa Sitio San Juan, Alaska, Mambaling, Dakbayan sa Sugbo niadtong Martes sa gabii.
Ang nasikop naila nga si John Lenard Rico Gonzales alyas Maico, 19, regional level watchlist, taga Tres de Abril, Pahina San Nicolas.
Nasakmit gikan kang Gonzales ang 21 ka medium-size, usa ka daku nga putos sa gituohang shabu nga motimbang og 130 gramos nga mobalor og P884 mil, buy-bust money ug sudlanan sa ginadili nga drugas.
Samtang tulo ka durugista ang nasikop sa buy-bust operation sa Sitio Holy Child, Bulacao, Dakbayan sa Talisay kagahapon sa kaadlawon.
Ang tulo nailhan nga sila si Jomar Abarquez, 32; John Philip Sawit Galleto, 30, ug James Ivan Lapuerta Labora, 32, nagpuyo sa maong lugar.
Si Police Major Gerard Ace Pelare, hepe sa kapolisan sa Dakbayan sa Talisay, nagkanayon nga subject nila sa operasyon mao si Abarquez kinsa gitumbok nga tigpayuhot og ilegal nga drugas sa ilang lugar.
Kuyog ni Abarquez ang iyang mga kliyenteng adik nga pulos sab nadakpan ug nakuha gikan kanila ang siyam ka gagmay nga pakete sa shabu. GMR (BANAT NEWS)
- Latest
