Kagutom singgit sa protesta

CEBU, Philippines — Kalisud ug kagutom ang gipaabot sa mga militanteng pundok sa gihimo nilang lihok-protesta kagahapon sa buntag.

Mga militanteng pundok sama sa Kilusang Magbubukid ng Pilipinas, mga mananagat ubos sa PAMANA-Sugbo, drivers nga sakop sa PISTON-Cebu ug uban pa ang nagtapok sa Fuente Osmeña Rotunda kagahapon.

Sigun sa chairman sa KMP-Cebu Chapter Nick Abasolo nga ila kining gihimo aron pagpakita sa ilang kasagmuyo sa buwan sa Kalibutanong Pagkaon.

Matud ni Abasolo nga ang kahimtang nilang mag-uuma ilawom sa administrasyon ni Presidente Rodrigo Duterte mas nigrabe pa ang ilang kagutom gumikan sa nagpadayon nga monopoliya sa kayutaaan, sa padayon nga pagpatuman sa mga proyekto sa Presidente sama sa New Liberal Policy diin ang ilang kayutaan nga gitikad nangaigo sa pagmina ug housing ug silang mag-uuma nadislokar sa ilang yutang gipanginabuhian.

“Kini usa ka pagkondena namo diin among gipakita nga wala na kami makahiuyon sa gihimo sa atong Presidente nga pagwagtang sa among kayutaan, gani kung tan-awon nimo dinhi sa Probinsiya sa Sugbo daghan na kaayong kayutaan nga agrikultura ang gi-convert sa mga quarry, pag-mina, naay subdivision, mga commercial diin ang mga mag-uuma nga nagtikad diha ug naa nanginabuhi napapahawa na intawon,” asoy ni Abasolo.

Si Abasolo niingon nga subo pamalandungon nga gipanghambog sa gobiyerno nga karon mao ang buwan sa Kalibutanong Pagkaon apan silang mag-uuma halos dili na makakaon makatulo sa usa ka adlaw.

Gikan sa Fuente Osmeña nihunong sila sa Police Regional Office 7 ug nagpahigayon og kalihukan sa dapit diin ilang gikondenar ang gihimo sa kapolisan sa ilang mga sakop nga giingong gipasakaan og kaso ug padayon nga biktma sa pagpanglapas sa katungod. Human sa PRO-7 nideretso sila sa dalan Colon ug didto gipadayon ang ilang lihok-protesta. (BANAT NEWS)