Anak ni Teban nilingkod na sa konseho
CEBU, Philippines – Hingpit na nga nilingkod isip konsehal sa Siyudad sa Talisay ang anak sa nitaliwan nga konsehal nga si Julian “Teban” Daan.
Si Lester Daan maoy ikaduhang anak ni kanhi Konsehal Teban ug ni board member Yolanda Daan.
Kagahapon, si Lester nanumpa kang Kongresista Eduardo Gullas kinsa maoy pangulo sa Partido Alayon.
Kini human nadawat nila ang rekomendasyon gikan kang Manny Villar kinsa maoy presidente sa Nacionalista Party niadtong Oktubre 14, 2019.
Ug si Gobernador Gwendolyn Garcia nisanong usab niini. Si Lester sa iyang bahin, nagkanayon nga dili na bag-o kaniya ang pagpanerbisyo tungod kay kanunay man siya nga magkuyog-kuyog sa iyang amahan ug inahan sa ilang mga lakaw sa pagserbisyo sa katawhan.
Apan giangkon ni Lester nga kinahanglan gihapon siya magtuon sa komitiba nga gihuptan sa iyang amahan ug ang mga programa niini nga nasugdan.
Si Lester nipasalig kini nga ang iyang buhatan kanunay nga bukas alang sa mga tawo nga nanginahanglan.
Samtang si Mayor Gerald Anthony “Samsam” Gullas, Jr. masaligon nga dugang kalamboan na usab ang maangkon sa siyudad ilabi na nga kompleto na usab ang lineup sa konseho. (/BDB)(BANAT NEWS)
- Latest
