Grado sa mga scholars tan-awon sa kapitolyo
CEBU, Philippines — Human sa hangyo sa mga scholars sa Paglaum Scholarship Program sa Kapitolyo nga ipabilin ang maong programa, i-review ang grado sa maong mga tinun-an ilabi na kadtong mga undergraduate pa.
Sa pagkakaron kompirmado nga bayran sa Kapitolyo ang nahabilin nga bayranan sa mga graduating nga tinun-an ngadto sa mga eskwelahan aron makuha nila ang ilang Transcript of Records (TOR).
Matud ni Gobernador Gwendolyn Garcia nga gipatawag nila ang mga eskwelahan kun asa nitungha ang mga scholars aron pagsaad nga mobayad ang Kapitolyo.
“Atong i-reassess, tan-awon nato unsay maintaining average sa uban,” matud ni Garcia.
Ang gobernador nagkanayon nga kinahanglan nga kung scholar seguraduhon nga walay bagsak ug anaa sa average ang grado. “Para nako, let’s do things right. Let’s do it the way it should be done because we are spending public funds. And I believe we should always raise the bar. Let’s not be contented with good enough, ‘ah pwede ra ang 75, unsaon man na ang sobra?’ It should not be good enough for Cebu and the Cebu Provincial Government,” matud ni Garcia.
Si Bise Gob. Hilario Davide III nihangyo sa gobernador nga dawaton sa pag-apply ang mga Paglaum scholars sa bag-ong scholarship program sa Kapitolyo.
Ang bag-ong administrasyon sa Kapitolyo niwagtang sa Paglaum Scholarship Program nga gisugdan sa niaging administrasyon ug nihimo karon sa bag-ong scholarship program nga magsugod sunod tuig. GMR (BANAT NEWS)
- Latest
