Pito ka eskapo sa OSC padayong gipangita

CEBU, Philippines — Wala pa gihapon madakpi pagbalik sa mga social workers inabagan sa kapolisan ang pito ka mga batang nieskapo gikan sa Operation Second Chance sa Barangay Kalunasan ning Dakbayan sa Sugbo, ang padayon nga gipangita sa kapulisan human sila nakaeskapo niadtong adlaw nga sabado.

Kini ang gitug-an ni Police Major Dindo Alaras, hepe sa Guadalupe Police Station nga gikahinabi sa mga tigbalita.

Matud pa ni Alaras, aduna hinuoy mga ginikanan sa mga batang eskapo ang nipahibalo nga ilang itahan ilang mga anak apan mihangyo lang usa sila og adlaw aron ilaha kining makauban sa pamilya.

Dugang pa ni Alaras, ilaha usab giagni ang uban mga ginikanan sa paghangyo sa ilang mga anak nga mobalikron mahuman ang ilang rehabilitasyon ug makompleto nila ang ilang mga tulobagon.

Mipasidaan si Alaras nga mapagan ug makasohan ang ginikanan kungilang gitagoan ang ilang mga anak nga nieskapo.

Samtang si Police Col. Gemma Cruz-Vinluan, director sa kapolisan sa siyudad nga kadtong nangikyas nagsabot gyud. Gani dili lang gyud unta kato ray makaikyas apan ang ubang mga bata mas gipili nga magpabilin sa OSC diin kay nalipay silang makakaon sila og sakto, giatiman ug makatungha pa.

Si Vinluan kinsa taas og kasinatian sa Women’s Protection Desk sa PNP miawhag sa katilingban nga tabangan sab ang mga bata sa OSC aron makita sa mga bata didto nga duna pay mga tawong modawat kanila.

Sumala pang Vinluan kaning mga bata sa OSC biktima ra sab sa kakabus ug kasaypanan sa ilang mga ginikanan. Giangkon ni Vinluan nga kining problemaha dili solong problema sa gobiyerno kondili sa katilingban sab kun dili sila tabangan.

Nunot niini, nagplano si Vinluan nga makigsabot sa usa ka sikat nga fast food chain nga maoy pangandoy sa mga bata sa OSC nga matilawan ilang lamiang fried chicken ug spaghetti.

Ang OSC adunay kapin ka 70 ka mga bata nga gi-rehabilitate tungod sa nagkadaiyang salaod. Tungod sa pageskapo, duna nay duha ka polis nga gidestino didto dili aron lang pagbantay kondili aron makighigala sa mga bata aron masayran ilang mga tagsatagsa ka problemang kinahanglang sulbaron matag karon ug unya.

Ang mga batang nakaikyas kadaghanan adunay kasong sa paghupot ug pagpamaligya og illegal nga drugas. IBM (BANAT NEWS)