Comelec registration naa sa Robinsons Galleria

CEBU, Philippines – Gipahigayon sa Commission on Elections (Comelec) Cebu City ang katapusang tulo ka adlaw sa pagpangrehistro sa mga botante alang sa 2020 nga eleksyon sa Barangay ug Sangguniang Kabataan sa Robinsons Galleria Cebu.

Si Comelec Cebu City North District Officer, Atty. Marchel Sarno, nagkanayon nga ang pagpangrehistro sa maong mall nagsugod kagahapon, karong adlawa ug sa Lunes gikan sa alas 10 sa buntag hangtud sa alas 5 sa hapon. Gibana-bana ni Sarno nga moabot sa 1,000 ang magparehistro niining nahabiling adlaw sa pagpangrehistro kutob sa Lunes.

Ang pagrehistro sa mga botante sa Cebu City North District anaa sa ikaduhang andana sa Robinsons Galleria Cebu samtang ang sa Cebu City South District anaa sa ikatulong andana. Base sa talaan sa Comelec Cebu City gikan Agosto 1 hangtud Septiyembre 25, 2019, aduna nay 14,033 nga narehistro nga mga aplikante sa North District samtang adunay 19,901 nga narehistro nga mga aplikante sa South District. (Mary Ruth Malinao/GMR)

Landfill sa Consolacion gipahunong

Gimanduan sa Environmental Management Bureau ang usa ka sanitary landfill sa Polog, Consolacion sa paghunong sa operasyon nunot sa mga kalapasan.

Ang EMB nipadala og notice ngadto kang Cipriano Abdon, ang proponent sa Asian Energy Systems Corporation, kalabot sa nahimong kalapasan sa sanitary landfill sa Presidential Decree 1586 o The Philippine Environmental Impact Statement System ug RA 9275 o ang The Philippine Clean Water Act of 2004.

Apil sa nakita nga kalapasan ang kapakyas pagpatuman og mitigating measures; wala pag-sumiter og semi-annual Compliance Monitoring Report; paghimo og kalihukan nga walay Environmental Compliance Certificate (ECC) ug pakyas paghatag og “effluent sampling port”. Ang EMB nihatag og 10 ka adlaw nga makatubag ang kompaniya ug gimanduan ang Pollution Control Officer niini nga motambong sa Technical Conference sa Oktubre 4 sa buhatan sa EMB.

Ang cease and desist order pinirmahan ni Engr. William Cuñado, ang regional director sa DENR-EMB-7 nga pinetsahan og Septiyembre 12, 2019. (/GMR)(BANAT NEWS)