Igsoon ni Tata Negro gipatay

CEBU, Philippines – Gipusil una gisunog sa mga armadong tawo ang igsoon ni Crisostomo “Tata Negro” Llaguno nga si Cary Llaguno sa panimalay niini sa Sitio Pili, Barangay Malubog, Siyudad sa Sugbo kagahapon sa kadlawon.

Ang sakyanan sa biktima nga itom nga Nissan Navarra nga dunay plakang FHZ 349 nakit-an nalang nga gibilin daplin sa karsada sa Barangay Busay.

Sa suok nga bahin sa Sitio Pili nahimutang ang panimalay ni Cary nga bisan habal-habal maglisud sa pagsaka gumikan sa katungason sa lugar.

Kuyog ni Llaguno sa panimalay ang iyang kapuyo nga si Girlie Loredo, amahan ni Girlie nga si Sonny Loredo, ug laing tulo ka babaye.

Matud ni Sonny nga samtang natulog sila kalit lang nipaghot ug nisaba ang iro ug nakadungog nalang siya nga dunay niingon nga “ari mo diri tuyok mo luyo”.

Iyang bana-bana moabot sa 30 ngadto sa 40 ka armadong tawo ang niransak sa balay apan wala silay nakita nga nawong tungod kay gawas nga nagtaptap ang mga responsable, sila sab kay gitaptapan ang mga mata.

Matud ni Sonny nga siya ug upat niya ka kauban gipagawas sa balay samtang si Cary nagpabilin.

Giingong gigapos ang biktima ug nakadungog sila og buto sa armas dayun nakita nalang nila nga gisunog ang panimalay ug naapil sa pagkasunog ang biktima.

“Giingnan pa sad gani nga ayaw dagan, pusilon ka ron, niana iyang mama sir ayaw sir malooy ka sir kay wala man nay sala,” matud ni Sonny.

Ang igsoon sa biktima kinsa nagdumili pagpahingan niingon nga wala siya’y ideya unsay nagpaluyo sa maong hitabo apan kini niasoy nga niadtong Hulyo ang iyang igsoon gidakop sa awtoridad apan gibuhian ra sab human nalimpyohan ang iyang pangan.

Niadtong Agosto giingong sa tindahan sa biktima nga water refilling station gipusil kini apan wala naigo human nakadagan.

Ang hepe sa Police Station 4 sa Cebu City Police Office, Captain Dexter Basirgo, nibutyag nga si Cary giingong usa ka drug personality sa Dakbayan sa Sugbo.

“Kana si Cary Llaguno ni-surrender na last year sa CCPO, ni- surrender na kang Lt. Col. Apilat last year ni-surrender na siya, seguro I don’t know why nahitabo na sa iyaha karon. Nigawas nana iyahang pangalan sa Cebu City nga drug personality,” matud ni Basirgo.

Hinoon palawman pa sa kapolisan ang ilang imbestigasyon kung unsay motibo sa krimen ug background sa biktima.

Si Tata Negro kinsa gidudahang drug lord nilansar nga independente sa pagka-konsehal sa Dakbayan sa Sugbo niadtong 2010 nga eleksyon apan gipusil patay niadtong Mayo 4 sa maong tuig samtang nangampanya sa Barangay Lorega-San Miguel. (/GMR)(BANAT NEWS)