Stakeholder niawhag tun-an ang usbaw sa suholan

CEBU, Philippines – Gipahigayon kagahapon sa buntag sa Dakbayan sa Sugbo ang public hearing alang sa usbaw sa suholan sa mga mamumuo ug kasambahay.

Ang maong Minimum Wage and Kasambahay Wage Public Hearing gipangulohan kini ni Director Salome Siaton, chairperson sa Regional Tripartite Wages and Productivity Board(RTWPB)-7 ug kasamtangan nga regional director sa Department of Labor and Employment (DOLE)-7 uban ang kaubanan niini sa board, mga petitioner ug mga nagkadaiyang stakeholders nga niduso sa ilang position papers.

Si Metudio Belarmino sa Cebu Labor Coalition ug Art Barrit, tigpamaba sa Association Labor Unions- Trade Union Congress of the Philippines (ALU-TUCP) malaumon nga mahatagan og pagtagad ang ilang gipangayo nga usbaw.

Ang mga petitioner nagtuo nga kinahanglan na ang usbaw sa suholan tungod kay nakita nila ang panginahanglanon niini ilabi na nga nagsaka ang mga palaliton ug kulang ra kaayo ang gidawat sa mga trabahante nga suhol.

Apan usa ka grupo gikan sa stakeholders niawhag sa RTWPB nga tun-an pag-ayo ang paghatag og usbaw nga silang mga magpapatigayon dili usab magproblema tungod kay sila usab apektado sa pagsaka sa presyon sa mga palaliton.

Si Siaton sa iyang bahin, nitug-an nga ang public hearing sa Dakbayan sa Sugbo maoy ikaduha diin ang unang public hearing gipahigayon niadtong Septiyember 17 sa Dakbayan sa Dumaguete.

Gitug-an ni Siaton nga aduna pa sila’y public hearing nga ipahigayon karong Lunes diha sa Dakbayan sa Bogo ug sa Oktubre 11, 2019 sa Probinsiya sa Bohol diin kuhaon nila tanang position paper ug ilaha kining tukion sa board base sa documents ug statistic nga ilang gihuptan. (/BDB)(BANAT NEWS)