Coastal clean-up niadtong Sabado malampuson

CEBU, Philippines —  Gihulagway sa Environmental Monitoring and Enforcement Division sa Environmental Management Bureau 7 nga malampuson ang gihimong International Coastal Clean-Up niadtong Sabado. 

Dunay mga volunteers nga gikan sa nagkalain-laing lugar sama sa Dakbayan sa Sugbo, Talisay, Mandaue ug Lapu-Lapu, ingon man Lungsod sa Cordova ug Consolacion.

May mga kawani sab sa national government agencies ug mga private companies, non-governmental organizations ug ubang grupo ang nitabang sa paglimpyo sa coastal areas nga gikalipay og daku sa EMB-7.

Apan matud ni Engr. Cindy Ochea, pangulo sa EMED sa EMB-7, nga padayon pa ang ilang pag-analisar sa data nga nahipos.

Kini tungod kay ang gitan-aw nila karon sa ilang clean-up dili na ang kadaghan sa basura nga makolekta apan kun unsa nga klase nga basura ang ilang nakolekta.

Samtang sa Dakbayan sa Talisay, plastik nga basura ang nagpasulabi nga nakolekta atol sa gihimo nga halapad nga pagpanglimpyo sa kasapaan ug kadagatan nga gipangulohan ni Mayor Gerald Anthony “Samsam” Gullas Jr. niadtong Sabado sa buntag.

Sa tulo ka oras nakakolekta sila og tulo ka metriko tonelada nga mga basura sa pito ka coastal barangay sa Pooc, Biasong, Dumlog, Poblacion, Cansojong, Tanke ug San Roque.

Si Gullas nagkanayon nga tipik kini ug kabahin sa iyang programa aron mahigmata ang katawhan sa pagdisiplina sa ilang kaugalingon sa paglabay sa basura.

Ang programa nga “Basura Mo Panginabuhian Ko” usa sa mga paagi nga madasig ang katawhan sa paghipos sa ilang basura tungod kay sa basura mahimo sila nga makakaon lakip na sab ang ilang pamilya kay sila premyohan man. (Decemay P. Padilla ug Gabriel C. Bonjoc/GMR)

Lechonero tabangan makapangita og baboy

Hayan maapektuhan ang himoong Inasal Festival sa Siyudad sa Talisay atol sa kapistahan karong Oktubre 15 kung dili gihapon mabalik sa normal ang suplay sa baboy.

Kapin sa 40 ka lechonero sa dakbayan ang nakigtagbo ni Mayor Gerald Anthony “Samsam” Gullas Jr. aron ipadayag ang ilang suliran kalabot sa ilang negosyo. Si Gobernador Gwendolyn Garcia nipagawas og executive order nga pugngan ang baboy gikan sa laing isla aron maseguro nga dili makalusot ang African Swine Fever (ASF) sa Luzon.

Apan si Dr. Mary Thessa Lorraine Alo, city veterinarian, nipasabot nga wala gipugngan ang baboy gikan sa Negros apan iseguro lang nga aduna silay saktong mga dokumento.

Ang baboy sa Negros maoy gisaligan sa mga lechonero sa Dakbayan sa Talisay sa dugay na nga katuigan. Aron matabangan ang mga lechonero, nanguha na sa listahan sa mga hog raisers sa dakbayan ug ubang lugar aron giyahan sila kung asa mopalit og baboy.

Giangkon sa mayor nga naa ang iyang simpatiya sa mga lechonero apan siya niingon nga mangita sila og solusyon niining suliran nga giatubang. (GMR) (BANATNEWS)