Re-routing gipatuman sa un avenue

CEBU, Philippines — Nabag-ohan ang mga drayber sa pribado ug publiko nga mga sakyanan sa gipatuman nga bag-ong traffic scheme sa UN Avenue sa Dakbayan sa Mandaue atol sa dry-run kagahapon.

Kini gipasiugdahan sa Traffic Enforcement Agency of Mandaue (TEAM) nga gipangulohan ni Archt. Florentino Nimor.

Ang drayber sa pribadong sakyanan nga si Ruel Anoos nga taga Lungsod sa Liloan daw gibati og kahingawa kay padulong kini sa Pier 1 sa pagsugat sa iyang asawa gikan sa Bohol apan nag-aginod na man ang iyang dagan subay sa dalan P. Burgos.

Si Nimor niingon nga molungtad og duha ka semana ang dry-run nga ilang gipahigayon ug makatabang sa mga drayber ang mga pahibalo nga ilang gipahimutang sa mga dalan subay sa D. M. Cortes St. ug Cansaga Bridge diin dunay direksyon gikan sa Mactan ug sa interseksiyon sa U.N. Avenue paingon sa Marcelo Fernan Bridge.

Ang mga sakyanan nga padulong sa amihanang bahin sa Sugbo subay sa D.M. Cortes St. nga moagi sa Cansaga Bridge maoy himoon ang pag-adto una ilawom sa Marcelo Fernan Bridge.

Kadtong mga sakyanan nga nagsubay sa Cansaga Bridge paingon sa Dakbayan sa Sugbo maoy himoon ang pagliko paingon sa tuo sa U. N. Avenue ug dayon liko sa wala sa P. Burgos St. ug moliko sa wala paingon sa A.C. Cortes St. (/GMR)(BANATNEWS)