Clamping sa Mandaue padayon bisan holiday

CEBU, Philippines – Higpit nga gipahimangnoan ang mga drayber sa tanang matang sa mga sakyanan sa Dakbayan sa Mandaue sa dili pagpataka og parking aron kalikayan nga ma-clamp ang ilang sakyanan.

Si Florentino Nimor Jr., pangulo sa Traffic Enforcement Agency of Mandaue (TEAM), nipadayag niini nunot usab sa ilang namatikdan nga daghan ang mga nag-ilegal parking nga sakyanan nga ilang na-clamp ang ligid niini.

Matud ni Nimor nga sukad sa Septiyembre 1 niining tuiga nga ilang gisugdan sa pagpatuman ang clamping ordinance ilang namatikdan nga bisan sa ilang mga pahimangno daw wala lang nagpakabana ang mga drayber hinungdan nga niabot na og 51 ka sakyanan ang ilang na-clamp. Dugang pa ni Nimor nga bisan sa adlaw nga Domingo ug mga holiday daw wala lang magpakabana ang mga drayber tungod kay daghan gihapon ang mag-ilegal parking nga mga drayber.

Gitataw ni Nimor nga dili matangtang ang clamp nga gitaud sa ligid sakyanan gawas lang kun makapakita ang drayber og resibo nga nakabayad na kini sa iyang multa sa buhatan sa tresurero sa dakbayan.

Si Nimor nitataw nga bisan mga holidays padayon ang ilang operasyon.

Ang mga sakop sa TEAM mopadayon sa ilang pag-clamp sa mga sakyanan nga nakalapas sa ordinansa.

Ang operation chief sa TEAM nga si Mario Gako niingon nga bisan sa kakuwang sa ilang mga personnel wala kini nila himoang babag sa pagtuman sa ilang trabaho nga mao ang paghapsay sa kadalanan ug mahawanan sa mga illegal parking sa ilang gimaneho nga sakyanan. (/GMR)(BANAT NEWS)