Bagong gikabikilan sa duha ka frat, tungod lang sa babaye

CEBU, Philippines – Naglaraw ang pangulo sa kapulisan sa Siyudad sa Talisay nga pakigkitaan ang mga lider sa duha ka dagkong fraternity nga nagsugod na sab og balik ang init nga gubot tali sa pipila ka miyembro sa isi’g ka habig nga niresulta na sa kamatayon sa ilang mga miyembro.

Kini human sa uwahing insidente sa pagpamusil nga gipasangil nga binuhatan sa membro sa Tau Gamma Phi Fraternity sa membro sa Alpha Kappa Rho (Akrho) sa Barangay Linao niadtong miaging semana.

Ang mga suspek mao sab ang gitumbok nga responsable pagpusil patay ni Police Senior Sergeant Alfredo Pagaling, polis sa Minglanilla nga nagsakay sa nakaparadang patrol car dihang ang duha    padung og ikyas human namusil og Akhro sa Talisay City.

Ang duha ka mga suspek napatay sab sa operasyon sa kapulisan didto sa lungsod sa San Fernando ug sa Dakbayan sa Carcar.

Matud pa ni Police Major Orlando Carag Jr., hepe sa kapulisan sa Syudad sa Talisay nga sa iyang pakisusi nagsugod ang pagpamusil sa mga sakop sa Tau Gamma ngadto sa biktima tungod lang kay nagkasuyaay gumikan sab sa ilang mga kuyog nga babaye diha sa imnanan.

Giklaro niya nga sayo pa kaayo nga moingon nga may kalabutan sa fraternity ang motibo sa pagpamusil tungod kay personal ang sinugdanan sa ilang away.

Hinuon nagpadala na si Carag og mensahe sa mga lider sa duha ka fraternities aron hisgutan ang panghitabo ug kun unsa ang ilang mahimo aron magpabilin nga malinawon ang ilang pagdumala sa ilang grupo.

Gani asoy pa ni Carag nga nagkaestorya nasab sila sa ubang mga chief of police sa silingan nga lungsod aron husayon ang duha kun aduna man silay gikabikilan.

Gipanghinaot lang sab ni Carag nga unta ang mga membro sa matag fraternity bugnaw og panghuna-huna ug likayan ang kagubot. (/IBM)(BANAT NEWS)